ونّات الأحباب و الغيّاب
ما أجوز منّك أبد /لو تدعي و حوبتك / أضل داوي إبنارك
صح إنتظاري خطاء / بس لو يعيد الوكت / هم إرجع أختارك
غرگیت و أنت البحر / كاتلني فرگه إبسهر / جالس و أعد إنجوم
أنساك لا ما أظن / نار و جمر و أحترگ / ما أكشف أسرارك
***
إتحيّرت و أنت السبب / بعت النّدامة إبذهب / و إنجرح دلّالي
يسألني وين المحب / ذاب إبرفاته الگلب / من ضيّع الغالي
شال و كسر خاطري / مبتليه بيَّ هلي / و أصحابي عافوني
إبوادي و حافي الجدم / لا ضِل أكو لا هدم / حال العطش حالي
***
وينك كتلني القهر / لابد تحن يا ولف / إمعذّبني دون أسباب
ملّيت من دنيتي / متمشكل إبعشرتي / و أنتظر دگت الباب
مثل الحمامة و أگر / عيّرني بيك الدّهر / لا خبر لا مرسال
أحسّن إبضهري سهم / و الألم دگ بإلعظم / صحّتي إبجيت الغاب
***
لا تبعد و تنسحب / بنغامي و أكتب غزل / للموت ما أنساك
ما أكسر إبخاطرك / و الزمن لو دهورك / إمگرّم و أضل ويّاك
بحلامي نمشي إبسفر / إبشرياني بيتك بحر / عيش إبّطن عيني
إتجافيني موتي إبعجل / إمحيّرني و أنت الأمل / يصعب علي فرگاك
***
بإلليل أحن و أنتحب / أهجر إبطورك و أون / طيفك يباريني
و الدّمعه ما بطّلت / أعاتب إصورّك بدي / ما ظنتي ناسيني
أفكر ذهب يا بلد / البُعد مو بل درب / البُعد بُعد إگلوب
أتبعك إبسيل و مطر / أنشد من إبيا كتر / بيك و يدلّيني
***
أويلي إوياك أندفن / تصعب علي غيبتك / لو بل گبر حطّوك
متحمّل البس حزن / إترابك و أهيله بدي / جثّة إبلحد دفنوك
أمر الديارك و أظن / ما أصدّگ أنت متت / و أگرا الحمد ونهال
بإلبچي و الدم يصب / من عيني ينزل غضب / وحدك هلك عافوك
***
إبليلت عرس بإلچفن / ممتد إبدار المحن / إشحاسبك ملك الموت
هم فاد بري الذمم / و الصلّوا و حنّطوا / و الشالوا التابوت
و گّلي إشجرا و إشسده / بأوّل ليالي إشبده / و الملف من حضروه
هم حاسبوك إبعشگ / چي دمّرتني إبحرگ / موسهله بيهه إتفوت
***
أنحت إبخيط السماء / إمصمم أصورك شخص / دمّيه و أنا ويّاك
و أبني إبذهب من لهب / متحف علي گبّتك / و أنهي العمر بجفاك
و أشتل ورد ساحتك / و أجلس و أوزّع تمر / و أتذكّر إسنيني
ما أحوس بس منمطل / أحسّن إبجسمي عدل / بس من يمر طرواك
***
تايه و حبّي رحل / يا ناس گلبي إنفطر / وين إشتكي علّتي
سكران بيّه وجع / تدّي إجروحي علي / عد يا بشر طبّتي
ملّاني حتّي السّهر / فاضحني دمعه الدّهر /نازل علي شلّال
و البيت اليَّ گبر / و النوم شل بل ضهر / كلفت علي محنتي
***
يا روحي كافي البچي / و الدمعة لا ترتخي / كافي الحزن و النوح
نتبعهم الغادروا / إبتابوت للمگبراء / هم يأتي يوم إنروح
ودعيهم أهل الشيم / إبذكر العمل و القلم / لمّي جواني إهموم
و الذنب يصبح عذب / و الگبر ستر اليحب / ضمدي الگلب مجروح
***
إتعدّن إسنين و غبت / و إبدار ظلمه نمت / و أنا أسحن إبروحي
عافاني بين الغرب / وحدي و اون و أنتحب / و الضمّد إجروحي
ما أنام ليلي المضى / و الصار بيَّ و جراء / شل حيلي و إعيوني
إفراگه ثجيل و حزن / يوم إعلى يوم أنتهي / زايد كثر نوحي
***
ولفي و غالي علي / من ودّعيته بچه / يعلم بعد ميعود
مطروح عينه تدث / إبمستشفى عألمنضدة / لابس ثياب السود
يقراء الشهادة إبهمس / إبكف ايدي ضل يلتمس / ايوصّيني لا أنساه
و الهواء إلأتنفسه / ذايب إبدمّي عمر / و ياكله منّي الدّود
***
جاسم محمد الحسّاني 10/09/2025
16/ربيع الأول/1447 18/06/1404
:: برچسب‌ها:
ونّات الأحباب و الغيّاب ,
:: بازدید از این مطلب : 5
|
امتیاز مطلب : 0
|
تعداد امتیازدهندگان : 0
|
مجموع امتیاز : 0
عضو شوید
عضویت سریع
آمار مطالب
آمار بازدید
